प्रधानमन्त्री बालेन्द्र शाह भने विगतका केही परम्परा बदलेर आइतबार दिउँसो दिल्ली उत्रिँदैछन् ।
पूर्वप्रधानमन्त्री तथा राजनीतिक दलहरूसँग पनि प्रधानमन्त्री बालेनले छलफल गरेका छैनन्। विगतमा प्रधानमन्त्री विदेश भ्रमणमा जानुअघि राष्ट्रपतिलाई भेटेर भ्रमणको तयारी, एजेन्डा तथा राष्ट्रिय हितका विषयमा जानकारी गराउने प्रचलन थियो।
विगतमा प्रधामन्त्रीहरू विदेश भ्रमणमा जाँदा नेपालमा देखिने तामझाम हुने छैन । भारत पुग्दा प्रधानमन्त्री बालेनले नेपालको विमानस्थलमा सबै उच्च पदस्थ अधिकारीहरूलाई बिदाइमा बोलाउने छैनन् ।
उनले न्यूयोर्क जाँदा नै यो परम्परा तोडिसके । भारतको यो राजकीय भ्रमणमा पनि उनले त्यहाँ तामझाम नगर्ने सरकारी अधिकारीहरूले बताएका छन् ।
यता भारतमा उनको सम्मानमा हुने गार्ड अफ अनर हुनेछ । उनी त्यसमा सहभागी हुनेछन् ।
प्रधानमन्त्री बालेन्द्र शाहको यो भ्रमण निकै छोटो छ । उनी करिब २५ घण्टा मात्र दिल्ली बस्दैछन् । आइतबार दिउँसो सवा ३ बजे दिल्लीमा अवतरण गर्ने उनी सोमबार दिउँसो ४:५० बजे नेपाल फर्किनेछन् ।
विगतका प्रधानमन्त्रीहरूले तीनदिन वा त्यो भन्दा बढीको भ्रमण गर्ने दिल्ली बाहिरका सहरहरूमा परियोजना हेर्ने वा धार्मिक मठ मन्दिर धाउने परम्परा पनि बालेनले तोड्नेछन् ।
उनको भ्रमण तालिका अनुसार उनी दिल्ली बाहेक कहिँ जाने छैनन् ।
प्रधानमन्त्री शाहको सबैभन्दा लामो भेट भारतीय प्रधानमन्त्री नरेन्द्र मोदीसँग सोमबार हुने छ । उनले १ घण्टा बढी एकल भेट गर्ने छन् ।
विगतमा प्रधानमन्त्रीहरूले भ्रमणका बेला भारतमा रहेका नेपाली उद्योगी व्यावसायीहरूसँग छुट्टै भेटघाट र अन्तर्क्रिया गर्थे । तर यसपटक प्रधानमन्त्री शाहले कसैलाई पनि भेट्ने छैनन् ।
नेपाली र भारतीय उद्योग व्यावसायीहरूसँगको भेटका लागि उनले अर्थमन्त्री डा.स्वर्णिम वाग्ले र परराष्ट्रमन्त्री शिशिर खनाललाई जिम्मा दिएका छन् ।
दुई मन्त्रीहरूले नै दुवै देशका उद्योगी व्यावसायीहरूसँग अन्तर्क्रिया गर्नेछन् ।
प्रधानमन्त्री शाह नेपाली राजदूतावासमा पनि जाने कार्यक्रम छैन । आइतबार दिउँसो दिल्ली आएलगत्तै उनको भारतीय विदेशमन्त्री एस. जयशंकरसँग उनी बसेकै ताज होटलमा भेट्ने कार्यतालिका छ ।
विगतमा प्रधानमन्त्रीहरूले विभिन्न मन्त्रालयका मन्त्रीहरूलाई पनि भेट्ने र आपसी संवाद गर्ने गरेका थिए । तर प्रधानमन्त्री शाहले जयशंकर बाहेक अन्य मन्त्रीहरूसँग छलफल गर्ने छैनन् ।
प्रधानमन्त्री शाहले हैदरावाद हाउसमा समकक्षी नरेन्द्र मोदीसँग भेटेपछि अयोध्या-जनकपुर रेल उद्घाटन लगायतका कार्यक्रममा सहभागी हुनेछन् ।
दुवै प्रधानमन्त्रीको छोटो ब्रिफिङ पछि भ्रमणको मूल काम सकिनेछ ।
राष्ट्रपति द्रौपदी मुर्मुसँग भेटेर सोमबार प्रधानमन्त्री शाह स्वदेश फर्किने छन् ।
भोटेकोशी बाढीपछिको पुनर्निर्माणका लागि केही ऋण र अनुदान लगायतका विषयमा सम्झौता गर्ने तयारी
यो भ्रमणमा भोटेकोशी बाढीपछिको पुनर्निर्माणका लागि केही ऋण र अनुदान लगायतका विषयमा सम्झौता गर्ने तयारी छ । यद्यपि कतिसम्मको सम्झौता हुन्छ भन्ने सरकारी अधिकारीहरूले भनिसकेका छैनन् ।
विगतका सहमति र सम्झौताहरूलाई टुंग्याउने गरी एउटा साझा प्रतिबद्धता जनाउने तयारी छ । यो भ्रमणमा क्रिकेटदेखि आईटीसम्मका विषयहरूलाई पनि दुई देशबीच सहकार्य बढाउनेबारे सहमति गर्ने तयारी छ ।
विगतमा भ्रमणमा भएका सहमति र सम्झौताको भाषाको एकरुपता मिलाउनेबारे कुरा नमिल्दा दुवै पक्षको संयुक्त वक्तव्य ननिस्केका उदाहरण पनि छन् । तर यसपटक दुवैले पक्षले नेपाल भारतको संयुक्त भिजन पेपरको रुपमा सार्वजनिक गर्ने तयारी छ ।
बालेन्द्र शाहले प्रधानमन्त्री भएपछि एक वर्षसम्म विदेश नजाने नीति लिएका थिए । तर आफ्नो सुरुवाती नीति बदल्दै उनी आठ महिनापछि भारत भ्रमणका लागि तयार भएका हुन् ।
सम्बन्धित खबर
बालेन भारत जाँदा तोड्दैछन् प्रधानमन्त्री भ्रमणका परम्परा
राष्ट्रपतिले डरपोक भएर प्रतिनिधिसभाको असंवैधानिक विघटन गर्नुभयोः ओली
आरजु र मलाई जेनजीले बचाएका हुन्, जेनजीको नाममा ५० वर्ष पुगेकाहरू लाठा बोकेर आएका थिए: देउवा
प्रधानमन्त्री आइतबार भारत भ्रमणमा जाँदै, नयाँ दिल्लीको एयरपोर्टमा राज्यमन्त्रीले स्वागत गर्ने
‘प्रधानमन्त्रीले सभापतिलाई थुने वा सभापतिले टेकओभर गरी प्रधानमन्त्री भए आश्चर्य मान्नु पर्दैन’
जो आउँछ, ओली, प्रचण्ड र देउवालाई थुन्दिन्छु भन्छ, हामीमाथि मजाक गर्ने: ओली
यो पनि पढौँ
पोखराका विवेक थापा: चलचित्रप्रतिको मोहले व्यवसायीबाट बने फिल्म निर्माता
स्याङ्जामा ४४४ मिटर लामो झोलुङ्गे पुल सञ्चालनमा, एक घण्टाको यात्रा १५ मिनेटमा
१८ वर्षभन्दा कम किशोरकिशोरीबीच सहमतिमा यौन सम्बन्ध भए जबरजस्ती करणी नमान्ने प्रस्ताव
अवकाश जीवन फलफूल खेतीमा लगाउँदै पूर्वएआईजी आचार्य