पोखरा । जापानले नेपाली कामदार लैजान प्रारम्भिक समझदारी भएपछि नेपालका लागि जापानी राजदूत र श्रम मन्त्रालयका सचिव महेशप्रसाद दाहालले समझदारीमा हस्ताक्षर गर्ने तयारी गरेका छन् ।
मन्त्रिपरिषद्को बैठकले दाहाललाई समझदारीमा हस्ताक्षरका लागि स्वृकिति प्रदान गरिसकेकाले उनले हस्ताक्षर गर्ने तयारी गरेका हुन् ।

समझदारीमा हस्ताक्षर गर्ने बिषयको टुंगो लागिसकेपनि कहिले हस्ताक्षर गर्ने भन्ने समय भने तय गर्न बाँकी रहेको श्रम मन्त्रालयले जनाएको छ ।  समझदारीमा नेपालबाट जापान कामदार लैजाने र जापानले उनीहरूलाई ‘स्पेसिफाइड भिसा’ दिने विषय उल्लेख हुने भनिएको छ ।

मन्त्रालयको अनुसरा जापानले चैत १८ देखि नै कामदार लैजाने गरी समझदारीमा हस्ताक्षरको प्रस्ताव यसअघिका वार्तामा गरेको थियो । तर कामदार लैजाने प्रक्रिया लगायतका विषय भने अझै ठोस रूपमा टुंगो लाग्न बाँकी छ ।

जापानले गत पुसमा नेपालसहित ९ देशबाट १४ प्रकारका कामका लागि कामदार भित्र्याउने निर्णय गरेको थियो । जापानले कामदार लैजान लागेकामध्ये दक्षिण एसियाबाट नेपालमात्र हो । आउँदो वैशाखमा जापानले कामदार भित्र्याउन परीक्षा लिने तयारी गरेको छ ।

जापानले नयाँ नीतिसँगै पहिलो पाँच वर्षमा ६० हजार नर्स भित्र्याउने लक्ष्य राखेको जनाएको छ। त्यस्तै रेष्टुरेण्ट क्षेत्रमा ५३ हजार भित्र्याउने लक्ष्य राखेको छ। जापानले पहिलो पाँच वर्षमा ३ लाख ४५ हजार १ सय ५० कामदार लैजाने तयारी गरेको छ।  समाचार स्रोत /सेतोपाटी