सूर्य तिमिल्सिना । नेपाल प्रहरीले अवलम्बन गरेको ‘समुदाय–प्रहरी साझेदारी’ कार्यक्रम अहिलेसम्म सात सय ५१ स्थानीय तहसँग सम्झौता भइसकेको छ । समाजमा हुने अपराध नियन्त्रणका गरी शान्ति सुरक्षा कायम गर्ने उद्देश्यले स्थानीय तहसँग सम्झौता ‘समुदाय–प्रहरी साझेदारी’ कार्यक्रम सुरु गरिएको हो ।

नेपाल प्रहरीले करिब ६ महीना अघिदेखि सुरु गरेको ‘समुदाय–प्रहरी साझेदारी’ कार्यक्रम अन्तरगत हालसम्म ७४० स्थानीय तहमासमिति समेत गठन भइसकेको छ ।  ‘हर प्रहर, गाउँ र नगरी, टोल टोलमा नेपाल प्रहरी’ नाराका साथ गत कात्तिक ११ गतेदेखि शुरु भएको सो कार्यक्रमअन्तर्गत ७७ जिल्ला समिति, ७४० पालिका समिति, पाँच हजार २९३ वडा समिति, चार हजार ८८८ टोल समिति र पाँच हजार ८७४ विद्यालय सम्पर्क समिति गठन गरिएको छ ।

समुदायसँगको साझेदारीबाट मात्रै दिगो शान्ति सम्भव हुनेहुँदा समुदायका अन्य निकायसँग साझेदारीको आवश्यकतालाई महसुस गर्दै प्रहरीले उक्त अभियान सुरु गरेको थियो ।

सामाजिक न्याय, राष्ट्रिय सुरक्षा, आपसी मेलमिलाप, सामुदायिक शिक्षा र जनचेतना जगाउने उद्देश्य राखेको यो कार्यक्रम अन्तर्गत प्रदेश नं १ मा एक हजार २७६, प्रदेश नं २ मा दुई हजार २४८, प्रदेश नं ३ मा दुई हजार ८३, प्रदेश नं ४ मा एक हजार ७४२ प्रदेश नं ५ मा तीन हजार १६९, कर्णली प्रदेशमा दुई हजार ३८८ र सुदूरपश्चिम प्रदेशमा दुई हजार १९५ वटा समिति गठन भएका छन् ।

नागरिक समाज, स्थानीय सरकार, विभिन्न सङ्घसंस्था, विद्यालयसमेतको सहभागितामा कार्यक्रम थालिएको छ भने कार्यक्रम सञ्चालनका लागि १० हजार बढी प्रहरी कर्मचारीलाई प्रशिक्षण गराएर स्थानीय तहमा खटाइएको छ ।