सूर्य तिमिल्सिना  ।  कोशी टप्पु वन्यजन्तु आरक्षभित्रको खाली जग्गा अतिक्रमण गरी घर बनाउन लगाउने मंगोलियन समूहका इन्चार्जलाई प्रहरीले पक्राउ गरेको छ । बुधबार सार्वजनिक जमिन अतिक्रमण गरी घर बनाएको भन्दै मंगोलियन समूहका इन्चार्ज शक्ति राईलाई प्रहरीले पक्राउ गरेको हो ।

 ‘मंगोलियन समूहका राईले झापा, धनकुटा, उदयपुर, भोजपुर, चितवन र गोरखासम्मका व्यक्तिलाई आरक्षको खाली जग्गामा घर बनाएर वस्ती नै बसाउने योजनाका साथ बोलाएको प्रारम्भिक अनुसन्धानका क्रममा खुल्न आएको प्रमुख जिल्ला अधिकारी सुरेन्द्र पौडेलले जानकारी दिए । राईले आफू मंगोलयन समूहको प्रदेश २ इन्चार्ज भएको प्रहरी समक्ष बयान दिएका छन् ।

कोशी टप्पु वन्यजन्तु आरक्षको जग्गा अतिक्रमण गरेर घर बनाउने उद्देश्यले पूर्व देखि पश्चिम सम्मका व्यक्तिहरु दैनिक उपभोग्य सामाग्री, खाना पकाउने ग्याससहित बालबच्चा लिएर  आएका थिए। आएका सयौं व्यक्तिलाई प्रहरीले धपाएको छ । सप्तरीको कञ्चनरुप नगरपालिका १ वैरवा नजिक कोशी टप्पु वन्यजन्तु आरक्षको जग्गामा घर बनाउन विभिन्न जिल्लाबाट आएका पाँच सयभन्दा बढी व्यक्तिलाई प्रहरीले लखेटेको थियो ।
अतिक्रमण गर्न लागेको सूचना पाएपछि पुगेको प्रहरीले चार राउण्ड अश्रु ग्यास प्रहार गरी उनीहरुलाई आरक्षबाट लखेटेको हो । उनीहरुले नजिकैको मानव वस्तीमा आश्रय लिएका छन् ।