जनकपुर : सिरहामा एक महिलालाई घाँटी थिचेर हत्या भएको छ ।  सिरहाको कर्जन्हा नगरपालिका-११ बस्तीपुर बस्ने अन्दाजी बर्ष २९ की चन्देश्वर यादवकी श्रीमती रितुदेवी यादवलाई घाँटी थिचेर हत्या गरिएको ईलाका प्रहरी कार्यालय मिर्चैयाले जनाएको छ ।

दिउँसो ३ बजे नै घटना भएपनि प्रहरीलाई भने ४ः३० बजेतर्फ  मात्र जानकारी भएको ईलाका प्रहरी कार्यालय मिर्चैयाका डिएसपी सुकदेव खनालले जानकारी दिए । घरकै सदस्यले रितुलाई आफ्नै घरमा मृत अवस्थामा देखेपछि छरछिमेकलाई जानकारी गराएको थियो ।

त्यसपछि स्थानीयहरुले पनि रितुलाई मृत अवस्थामा देखेपछि हल्ला मच्चिएको थियो । यता, उक्त घटनामा रितुका श्रीमान चन्देश्वर यादवलाई नियन्त्रणमा लिएको छ । प्रहरीका अनुसार रितुको हत्यामा उनका श्रीमानको संलग्नता हुन सक्ने भएकोले अनुसन्धानको लागि मात्र तत्कालै नियन्त्रणमा राखिएको हो ।

स्थानीयवासीका अनुसार, रितुले छोरा नजन्माएको कारण उनलाई घाँटी थिचेर हत्या गरेको हुन सक्नेछ । रितुको एक छोरी मात्र रहेकी छन्। उनलाई छोरा नहुँदा परिवारिक तवरबाट विवाद हुँदै आएको थियो । मृतकको शवलाई पोष्टमार्टमको लागि लहान स्थित रामकुमार शारडा उमा प्रसाद स्मारक अस्पतालमा लगिएको छ भने यस घटनाबारे अनुसन्धान तीव्र पारिएको डिएसपी खनालले जानकारी दिए । nepallive