काठमाडौँ । राष्ट्रिय फुटबल टोलीको बन्द परीक्षणमा सहभागी हुन आएका एक खेलाडीमा कोरोना संक्रमण पुष्टि भएको छ । गत मंगलबार संक्रमित खेलाडीको स्वाब परिक्षण गरिएको थियो । संक्रमित खेलाडीको बिहीबारको परिक्षण नतिजा पोजेटिभ आएको थियो ।

एन्फाले तत्काल सूचना जारी गर्दै एक खेलाडीको पुन: परिक्षण गरिने बताएको थियो । बिहीबार दोस्रो पटक गरिएको परिक्षणको रिपोर्ट समेत पोजेटिभ आएको हो । कोरोना देखिने खेलाडीको नाम भने गोप्य राखिएको छ ।

कतार विश्वकप छनोट र एसियन कप छनोट खेल्ने ३४ खेलाडीसहित प्रशिक्षक, अफिसियल र होस्टलका कर्मचारी गरि ५४ जनाको कोरोना परीक्षण गरिएकोमा हिजो ५३ जनाको रिपोर्ट नेगेटिभ आएको थियो ।खेलाडीहरुको लगनखेल स्थित पाटन अस्पतालमा स्वाब संकलन गरि परीक्षण गरिएको एन्फाले जनाएको छ ।

एन्फाले मंगलबार ललितपुरस्थित पाटन अस्पतालसँगको समन्वयमा उपत्यका भित्र घर भएका र आफ्नै घरमा क्वारेन्टिनमा बसेका २३ खेलाडी, प्रशिक्षक, अफिसियल र आवस्यक कर्मचारिगरी २९ जनाको पीसीआर परिक्षण गराएको थियो । त्यसअघि सोमबार होटलमा क्वारेन्टिन बसेका ११ खेलाडी सहित अन्य २५ को कोरोना परिक्षण गराएको थियो ।

नेपालले असोजमा चाईनिज ताईपे र अष्ट्रेलियासँग तथा कात्तिकमा जोर्डनसँग खेल्ने तालिका थियो । कोरोना महामारीका कारण विश्वकप छनोट र एसियन छनोटका खेलहरु भने रद्द भइसकेका छन् भने बन्द परीक्षण कार्यक्रम पनि पछि स्थगित भइसकेको छ ।

एन्फाले भदौ १ गतेबाट राष्ट्रिय फुटबल टिमको प्रशिक्षण सुरु गर्ने तयारी स्वरुप सबै खेलाडीलाई उपत्यकामा बोलाएको थियो । कतिपय खेलाडीहरु घरसमेत फर्किसकेको जनाइएको छ ।