कञ्चनपुरमा १४ वर्षीया किशोरीले झुटो बोल्दा उनका १५ वर्षीय प्रेमी बलात्कार आरोपमा पक्राउ परेका छन् ।

डेटिङपछि घर फर्कन ढिला हुँदा किशोरीले अज्ञात समूहबाट आफू अपहरणमा परेको र सामूहिक बलात्कारको सिकार भएको भन्दै परिवारलाई ढाँटेकी थिइन् । त्यसपछि परिवार प्रहरीकहाँ पुग्यो र प्रहरीकहाँ पनि उनले झुटो बयान दिएको पुष्टि भएको छ ।

पुनर्वास नगरपालिका-२ मोतिबस्ती बस्ने १४ वर्षीया किशोरीले आफूलाई अपहरण गरी सामुहिक बलात्कार गरिएको भन्दै परिवार तथा प्रहरीलाई झुक्याएकी हुन् । उनले शुक्रवार साँझ साढे ७ बजेतिर कलम किन्न नजिकैको पसलमा जाने क्रममा मोटरसाइकलमा आएका ३ जना युवकहरूको समूहले अपहरण गरी अज्ञात स्थलमा लगेको र बलात्कार पछि मध्यरातमा सोही ठाउँमा छोडेर गएको भन्ने बयान दिएकी थिइन् ।

तर, २४ घण्टा नबित्दै किशोरीले झुटो बयान दिएको पुष्टि भएको जिल्ला प्रहरी कार्यालय कञ्चनपुरले जनाएको छ ।  प्रहरीका अनुसार किशोरीले प्रेमी भेट्न गएको र घर फर्किन ढिला भएपछि परिवारको डरले नाटक गरेकी हुन् ।

किशोरीले परिवारकै अगाडि आफू अपहरणमा नपरेको र प्रेमीलाई भेट्न गएको स्वीकार गरिसकेको समेत प्रहरीले जनाएको छ । प्रहरीले किशोरीका १५ वर्षीय प्रेमीलाई समेत नियन्त्रणमा लिएको छ । किशोरीको उमेर कम भएकाले प्रेमी माथि जबरजस्ती करणी अन्तर्गत अनुसन्धान गरिरहेको प्रहरीले जनाएको छ । प्रेमी पनि १५ वर्षका रहेकाले उनी पनि पूरै सजायको भागिदार भने हुँदैनन् ।

झुटो बोल्दा डेटिङ भारी बन्न पुगेको छ भने राजिखुशीमा यौन सम्पर्क नै भएको भएपनि किशोरी उमेर कम भएकाले जबर्जस्ती करणीमा रुपान्तरित भएको छ ।