एजेन्सी – गोलरक्षक इमिलियानो मार्टिनेज टाइब्रेकरमा नायक बन्दा अर्जेन्टिना कोपा अमेरिका २०२१ को फाइनलमा प्रवेश गरेको छ । मार्टिनेजले तीन पेनाल्टी बचाएपछि अर्जेन्टिनाले कोलम्वियालाई टाइब्रेकरमा ३–२ ले पराजित गर्दै फाइनलमा ब्राजिलसँगको भेट पक्का गरेको हो ।

निर्धारित समयको खेल १–१ गोलको बराबरीमा टुंगिएपछि खेलको निर्णय सिधै पेनाल्टी सुटआउटबाट लिइएको हो । कोलम्वियाको पहिलो प्रहारमा जुआन कोर्डाडोले गोलमा परिणत गरेका थिए । त्यसपछि अर्जेन्टिनाका कप्तान लियोनल मेस्सीले गोल गरेका थिए । डाभिन्सन सान्चेजको प्रहाराई अर्जेन्टिनाका गोलरक्षक मार्टिनेजले बचाउँदा अर्जेन्टिनाका रोड्रिगो डि पउलको प्रहार आकासिएको थियो ।

त्यसपछि यारी मिनाको प्रहारलाई मार्टिनेजले विफल पार्दा अर्जेन्टिनाका लियान्द्रो ड्यानियल पारेडेसले गोल गर्दै टोलीलाई अघि बढाए । त्यसपछि मिगुइल बोर्जाले गोल गर्दै कोलम्वियाको सम्भावना जीवित राखेको थियो । लोउटारो मार्टिनेज गोल गरेपछि अर्जेन्टिना फाइनल नजिक पुगेको थियो । कोलम्वियाका इडविन कोर्डाेनाको पेनाल्टीलाई मार्टिनजेल विफल पार्दै अर्जेन्टिनालाई फाइनलको बाटोमा डोर्याए ।

ब्राजिलमा बुधबार बिहान भएको खेलको सातौ मिनेटमा लोउटारो मार्टिनेजले गोल गर्दै अर्जेन्टिनालाई १–० को अग्रता दिलाए । एक गोलले पछि रहेको कोलम्वियाले दोस्रो हाफमा अर्जेन्टिनालाई दवाव बढाउदै बराबरी गोल फर्काउन सफल भयो । ६२औं मिनेटमा कोलम्वियाका लुइस डियाजले बराबरी गोल फर्काउन सफल भए । लुइस डियाजले इडविन कार्डानाको चलाखीपुर्ण फ्रिकिक पासमा पेज्जेलासँग संघर्ष गर्दै आफै अनियन्त्रित भएको अवस्था गोलरक्षक पनि अघि बढेको अवस्थामा फार पोस्टमा उत्कृष्ट फिनिस गर्दै खेललाई बराबरीमा ल्याउन सफल भएका थिए ।

अब अर्जेन्टिनाले उपाधिका लागि ११ जुलाईमा ब्राजिलको सामना गर्नेछ । साविकको विजेता ब्राजिलले मंगलबार बिहान पेरुलाई १–० ले हराउँदै फाइनलमा स्थान सुरक्षित गरिसकेको छ ।

ब्राजिल र अर्जेन्टिनाबीच ‘फाइनल’

अब आइतबार बिहान माराकान स्टेडियममा ब्राजिल र अर्जेन्टिनाबीच फाइनल खेल हुनेछ । दक्षिण अमेरिकाका १० टिम सहभागी प्रतियोगितामा ब्राजिल र अर्जेन्टिना अपराजित बन्दै फाइनल पुगेका हुन् । ब्राजिल र अर्जेन्टिना १४ वर्षपछि कोपा अमेरिकाको फाइनल आमन सामने हुने भएको छ ।

अर्जेन्टिनाले १४ पटक कोपाको उपाधि जितिसकेको छ र यस पटक च्याम्पियन बने सर्वाधिक १५ पटक जित्ने उरुग्वेको कीर्तिमान बराबरी गर्नेछ । सर्वाधिक ५ पटक फिफा विश्वकप जितेको ब्राजिलले भने ९ पटक मात्र कोपा जितेको छ र सर्वाधिक उपाधि जित्नेमा तेस्रो स्थानमा छ ।

अर्जेन्टिनाले सन् १९९३ मा पछिल्लो पटक कोपा जितेको थियो । त्यसयता कुनै पनि ठूलो प्रतियोगिताको उपाधि जित्न सकेको छैन । २००४ यता अर्जेन्टिनाले चार पटक कोपाको फाइनल र एक पटक विश्वकपको फाइनल खेलिसकेको छ ।

ब्राजिलले भने २१औं शताब्दीमै ३ पटक कोपा अमेरिकाको उपाधि जितिसकेको छ । सन् २००४ र २००७ को फाइनलमा अर्जेन्टिनालाई हराएर ब्राजिलले उपाधि जितेको थियो । अर्जेन्टिना त्यसपछि पनि दुई पटक फाइनलमा पराजित भयो । अर्जेन्टिना २०१५ र २०१६ को फाइनलमा चिलीसँग पराजित भएको थियो ।

२०११, २०१५ र २०१६ मा राम्रो प्रदर्शन गर्न नसकेको ब्राजिलले २०१९ मा घरेलु मैदानमै उपाधि जितेको थियो ।

वर्तमान विश्वकप फुटबलका स्टार खेलाडी लिओनल मेस्सीको कप्तानीमा अर्जेन्टिना यस पटक उपाधि जित्दै झण्डै तीन दशकको उपाधि खडेरी तोड्ने लक्ष्यमा छ । ब्राजिल भने घरेलु मैदानमै फेरि च्याम्पियन बन्न चाहन्छ ।

सेमिफाइनलमा पेरुलाई हराएपछि ब्राजिलियन स्टार नेयमारले पनि फाइनलमा अर्जेन्टिनासँग खेल्न चाहेको प्रतिक्रिया दिएका थिए ।

मेस्सी र नेयमारले स्पानिस क्लब बार्सिलोनामा केही वर्ष सँगै बिताएका थिए । अब कोपामा भने यी दुई खेलाडी एक अर्काविरुद्ध मैदान उत्रनेछन् । मेस्सीले पनि आफूहरु साथी भएकोले नेयमारले म पनि त्यहाँ होस् भन्ने चाहेको बताएका छन् ।

मेस्सीलाई फाइनलमा हार्नुको पीडा राम्रोसँग थाहा छ । सन् २००७, २०१५ र २०१६ मा फाइनल हार्दा मेस्सी अर्जेन्टिनी टिमको सदस्य थिए । पछिल्लो दुई फाइनल मेस्सी नै कप्तान थिए ।

उता नेयमारले २०१९ को कोपा चोटका कारण गुमाएका थिए । त्यसैले दुवै खेलाडी कोपाको ट्रफी चुम्नका लागि आतुर छन् ।

कोपाको फाइनल इतिहास हेर्दा अर्जेन्टिना हाबी देखिन्छ । ब्राजिल र अर्जेन्टिनाले कोपाको फाइनलमा अहिलेसम्म १० पटक भिड्दा ८ पटक अर्जेन्टिनाले जितेको छ । ब्राजिलले अर्जेन्टिनाविरुद्ध दुई फाइनल मात्र जितेको छ ।

अहिलेसम्म २८ पटक फाइनल खेल्दा अर्जेन्टिना १४ पटक च्याम्पियन र १४ पटक नै उपविजेता बनेको छ । यस्तै २० पटक फाइनल पुगेको ब्राजिलले ९ पटक उपाधि जित्दा ११ पटक उपविजेता बनेको छ । जसमा ८ पटक अर्जेन्टिनासँग नै पराजित भयो भने दुई पटक उरुग्वे र एक पटक पाराग्वेसँग पराजित भएको छ ।

संयोग के छ भने ब्राजिलले अहिलेसम्म घरेलु मैदानमा खेलेको सबै कोपाको उपाधि जितेको छ । सन् १९१९, १९२५, १९२९, १९३७ र २०१९ मा आयोजक हुँदा ब्राजिलले उपाधि जितेको थियो ।

२०१९ को कोपा को सेमिफाइनलमा ब्राजिलसँग पराजित भएयता अर्जेन्टिना १९ खेलसमम्म अपराजित छ । ब्राजिललाई अन्तिम पटक हराउने टिम पनि अर्जेन्टिना नै हो । २०१९ को नोभेम्बरमा अर्जेन्टिनासँग हारेयता ब्राजिल १३ खेलसम्म अपराजित छ ।