काठमाडौँ । संयुक्त राष्ट्रसंघीय जलवायु सम्मेलन कोप–२६ मा विश्वका शीर्ष नेताहरुले सन् २०३० सम्ममा वन विनाश रोक्ने प्रतिबद्धता जनाउँदै छन् ।

स्कटल्याण्डको ग्लास्गोमा जारी सम्मेलनमा सहभागी देशका प्रमुखले आज सन् २०३० सम्ममा वन विनाश नियन्त्रण सम्बन्धी सहमतिमा आज हस्ताक्षर गर्ने भएका हुन् ।

अमेजन जंगल क्षेत्रको ठूलो हिस्सा फडानी भएको ब्राजिललगायतका देशहरुले उक्त सहमतिमा हस्ताक्षर गर्ने जनाइएको छ ।

सहमतिमा हस्ताक्षर गर्ने देशहरुले विश्वको ८५ प्रतिशत भन्दा बढी वनक्षेत्र ओगट्ने छन् । सहमतिलाई सम्मेलनको महत्वपूर्ण उपलब्धिको रुपमा हेरिएको छ ।

विश्वभर जंगल फडानीको क्रम तीब्र भइरहँदा अमेजनको जंगल फडानीले जलवायु परिवर्तनको गतिलाई तीब्र बनाएको ठहर गर्ने गरिएको छ । सहमतिमा फडानी भएका वन क्षेत्रको पुनस्थापनाका लागि थप वित्तिय सहयोग र लगानीको बाचा समेत गरिने भएको छ ।

त्यसैगरी २८ वटा देशले खाद्यान्न उत्पादन, चरी चरन र ब्यापारका लागि वनको फडानी नगर्ने सहमति पनि भएका छन् ।

यसअघि हिजो सम्मेलनमा सम्बोधन गर्दै संयुक्त राष्ट्रसंघका महासचिव एन्टोनियो गुट्रेसले जलवायु परिवर्तनलाई गम्भीर रुपमा लिन विश्वका नेताहरुलाई आग्रह गरेका थिए ।