मिडिया एक्शन नेपालले लैङ्गिक संवेदनशील पत्रकारिता सम्बन्धी हाते पुस्तक सार्वजनिक गरेको छ । पुस्तकमा नेपाली सञ्चारमाध्यममा लैङ्गिक संवेदनशीलता अन्तरगत पत्रकार महिलाको बाइलाइन, समाचारको स्रोतमा महिला र अल्पसंख्यक यौनिक समुदाय, सम्पादकीय र विचारमा महिला सरोकारका विषयमा अध्ययन गरिएको छ ।

नेपालभरबाट २० वटा मिडियामा दुई महिनाको अवधिमा प्रकाशित भएका २१ हजार ९ सय १९ वटा सामग्री माथि गरिएको अध्ययनमा जम्मा ७६ वटा पत्रकार महिलाले लेखेका बाइलाईन प्रकाशित भएका थिए । ती प्रकाशित सामग्रीमा जम्मा ३ सय ८८ अर्थात् १.६७ प्रतिशतमात्र महिला र लैङ्गिक अल्पसख्यकको बारेमा रहेको छ । यसले नेपाली सचांरमाध्यममा महिला र लैङ्गिक अल्पसंख्यकका सामाग्रीहरुलाई कम महत्व दिने गरेको निष्कर्ष अध्ययनले देखाएको छ ।

पुस्तकलाई सार्वजनिक गर्दै मिडिया एक्शन नेपालका अध्यक्ष लक्ष्मणदत्त पन्तले सञ्चारमाध्यम र त्यहाँबाट प्रकाशन र प्रसारण हुने समाचारलाई लैङ्गिकमैत्री बनाउनु जरुरी भएकोमा जोड दिए । उनले महिला र लैङ्गिक अल्पसंख्यक समुदायका कथा वस्तुलाई सञ्चारमाध्यममा महत्वका साथ स्थान दिनुपर्ने आवश्यकतालाई औंल्याए ।

अनलाईनको माध्यमबाट भएको कार्यक्रममा राष्ट्रिय महिला आयोगकी अध्यक्ष कमला पराजुली, प्रेस काउन्सिल नेपालका अध्यक्ष बालकृष्ण बस्नेत र दिल्लीमा उच्च आयोग क्यानाडाका लागि राजनीतिक, आर्थिक र सार्वजनिक मामिलाकाप्रमुख म्याथ्यू लोकेनसंगै देशभरका १ सय ४० जना पत्रकारले सहभागिता जनाएका थिए ।