निधारमा बिहुँत अनि सेतो धोति र कुर्थामा सजिएका स–साना बटुकहरु, सबैको एक स्वरमा स्वस्ति वाचन । पोखराका युवाहरु खाद्यान्न सामग्री लिएर स्याङ्गजाको आँधिखोला गाउँपालिका २, काफलटारीमा अवस्थित संस्कृत गुरुकुलमा पुग्दा बेग्लै रौनक थियो ।

शहरी क्षेत्रदेखि केहि टाढा भएर पनि होला, संघसंस्थाहरुको बिरलै मात्र नजर परेको उक्त संस्कृत गुरुकुलमा दाह्री ग्याङ पोखराले खाद्यान्न सामाग्री वितरणको जमर्को गर्दै गर्दा बटुकहरुमा छुट्टै उमंग छाएको देखिन्थ्यो । त्यस्तै, स्वस्तिवाचन सहित रुद्राक्षको मालाद्वारा स्वागत पाउँदा दाह्री ग्याङकै सदस्य समेत अन्यत्र भन्दा बिल्कुलै फरक अनुभव भएको बताउँदै थिए ।

शनिबार दाह्री ग्याङ पोखराका युवाहरु चामल, दाल, तेल, चिनी, चिउरा लगायतका विविध खाद्यान्न सामग्री लिएर सो संस्कृत गुरुकुलमा पुगेका हुन् । खाद्यान्न हस्तान्तरण कार्यक्रममा बिद्यालयका प्रधानाध्यापक रामचन्द्र तिमिल्सिनाले स्याङ्जाको उत्तरी भेगमा रहेको उक्त आश्रममा पोखरादेखि आएर सहयोग गर्दा सबैलाई हार्दिक स्वागत सहित खुशी व्यक्त गरे ।

कार्यक्रममा दाह्री ग्याङ पोखराका संयोजक अभिमन्यु पाण्डेले आफूहरुसँग प्रशस्त पैसा भएर भन्दा पनि सबै साथीभाइहरुले खाजा खर्च कटाएर सहयोग गरेको बताए । “दाह्री ग्याङ भनेको एउटा युवा सोच र अभियान भएको कारण आफूहरुको सहयोग एउटा सांकेतिक सन्देश हो’– उनी भन्दै थिए । त्यस्तै, दाह्री ग्याङ पोखराकै संस्थापक संयोजक शेखर गौतमले आफ्नो धर्म संस्कृति र संस्कृत शिक्षा प्रवद्र्धन गर्न र बटुकहरुको प्रोत्साहनको लागि आफूहरुले केही सहयोग गरे पनि दिगो रुपमा संघ, प्रदेश र स्थानीय सरकारकै सहयोग अपरिहार्य रहेको बताए ।

विद्यालय व्यवस्थापन समितिका अध्यक्ष पुण्य प्रसाद उपाध्यायले आफ्नो धर्म संस्कृतिको प्रवद्र्धनको लागि उक्त संस्कृत गुरुकुल खोलेको र दिगो श्रोत नभए पनि सरकारको आंशिक सहयोग र यस्तै शुभेच्छुकहरुले गरेको सहयोगमा आश्रम चलेको बताए ।

अन्नदान भनेको प्राणदान हो, आज दारी ग्याङले खाद्यान्न सामाग्री सहयोग गरेर प्राण दान गरेको भन्दै हार्दिक धन्यवाद सहित भविष्यमा पनि यस्तै सहयोग, सल्लाह र अन्य व्यक्ति संघसंस्थासंग समेत पहलको अपेक्षा व्यक्त गरे । दाह्री ग्याङ पोखराकै सह–संयोजक बसन्त मिश्रले कार्यक्रम संचालन गरेका थिए । दारी ग्याङलाई संस्कृत गुरुकुलसम्म लैजानको लागि संयोजन ईन्जिनियर सूर्य तिमिल्सिनाले गरेका थिए ।

वि.सं. २०६२ सालदेखि संचालित उक्त संस्कृत गुरुकुलमा करिब २० जिल्लाका ५ दर्जन बढी बिद्यार्थी अध्ययनरत छन् । अधिकांश विद्यार्थी न्यून आय भएका परिवारका छन् । एउटै विद्यालयमा नेपाली, संस्कृत, अंग्रेजी र कम्प्युटर शिक्षा समेत पढाई हुने र खान, बस्न पढ्न सबै निशुल्क हुँदा पछिल्लो समय विद्यार्थीको आकर्षण समेत बढ्दो छ । कक्षा १० सम्म पढाई हुने उक्त संस्कृत गुरुकुल मुठीदानको भरमा चल्दै आएको छ ।