मोरङमा एक विद्यालयको शौचालयको खाडलमा डुबेर एक नाबालकको मृत्यु भएको छ ।

बिहीबार साँझ सुनवर्षी नगरपालिका ९ स्थित भेडुवाथानमा रहेको बीपी आधारभूत विद्यालयको शौचालयको खाडलमा डुबेर ३ वर्षीय बालक खेम दासको मृत्यु भएको प्रहरीले जनाएकोे छ ।

स्थानीय सन्तोषकुमार दासका छोरा आमा जमुनादेवी दासलाई पछ्याउँदै जाने क्रममा खाडलमा खसेका थिए । विद्यालय परिसरको शौचालयको खाडल माथिबाट नछोपिएकाले बालक खसेर डुबेको हो ।

बालकका अभिभावक विद्यालयभन्दा बाहिर चिया पसल गर्थे।

रिङ लगाएर बनाइएको शौचालयको खाडल भने ढकन नलगाइकन खुलै छाडिएको पाइएको छ। शौच गर्न आमा जमुनादेवी दास विद्यालयको शौचालयतिर गएको देखेपछि ३ बर्से नाबालक पनि पछिपछि गएको प्रहरीको प्रारम्भिक अनुसन्धानबाट खुलेको छ। आमा शौचालयमा पसेका बेला बालक भने पाँच फिटभन्दा गहिरो हजमा खसेर प्रहरीले जनाएको छ ।

बालकले लगाएको एउटा चप्पल शौचालयको हजभित्र र अर्को बाहिर फेला परेको थियो। हजभित्र डुबेको आशंकामा खोजी गर्दा डुबेर घाइते भएको अवस्थामा बालकलाई फेला पारिएको प्रहरीले जनाएको छ।

प्रहरीका अनुसार बालकको उपचारका क्रममा साँझ ७ बजेतिर रंगेली अस्पतालमा मृत्यु भएको हो ।

गत असारमा मात्रै ढकन बनाएर दुवै शौचालयको खाडल छोपिएको थियो। तर केही बदमासहरुले साउनमै महिला शौचालयको हजको ढकन भने फुटाएर फ्यालिदिएको विद्यालयका प्रधानाध्यापक सञ्जीव राजवंशीले बताए।

६ महिनासम्म शौचालयको हज व्यवस्थित नगर्नु विद्यालयको चरम लापरबाही भएको स्थानीयले आरोप लगाएका छन्।