नेपाली कांग्रेसका सभापति एवं प्रधानमन्त्री शेरबहादुर देउवाले गठबन्धन राष्ट्रिय आवश्यकता भएको बताएका छन् ।

पाँच दलीय गठबन्धनद्वारा आइतबार पोखरामा आयोजित बृहत् चुनावी सभालाई सम्बोधन गर्दै देउवाले गठबन्धनलाई बलियो बनाएर लैजानुपर्नेमा जोड दिए ।

गठबन्धन कांग्रेसका लागि सबैभन्दा बढी आवश्यक भएको देउवाको भनाइ थियो । ‘गठबन्धन बन्नुअघि हाम्रो कस्तो अवस्था थियो, आज कांग्रेसको नेतृत्वमा सरकार छ, सबै पार्टी मिलाएर बसेको छ,’ देउवाले भने ।

गठबन्धनमा शङ्का, उपशङ्का गर्नुपर्ने अवस्था नरहेको जनाउँदै उनले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी) अध्यक्ष माधव नेपाल एवं गठबन्धनका दलले उदार भएर कांग्रेसलाई सहयोग गरेको उल्लेख गरे ।

गठनबन्धनले ६ महानगरमध्ये तीनवटा महानगरको नेतृत्व कांग्रेसलाई दिएको देउवाको भनाइ थियो । ‘कांग्रेसले बलियो महानगर पाएको छ । अरुले एक–एक वटा लिएर चित्त बुझाउनुभएको छ । उहाँहरूले धेरै छोड्नुभएको छ,’ उनले भने, ‘त्यसैले गठबन्धनलाई जिताउनु कांग्रेसको कर्तव्य हो । माधवजी र प्रचण्डजीको पार्टीभन्दा बढी मिहिनेत गरेर कांग्रेसले गठबन्धनलाई जिताउनुपर्छ ।’

गठबन्धनकै कारण प्रदेश र संघमा कांग्रेसको सरकार बनेकाले गठबन्धनप्रति कांग्रेस दृढ हुनुपर्ने देउवाले बताए । उनले गठबन्धन राष्ट्रिय आवश्यकता भएको दाबी गरे । ‘गठबन्धनको सरकार राष्ट्रिय, ऐतिहासिक आवश्यकता हो । राष्ट्रिय आवश्यकतालाई अझ मजबुत बनाएर लैजानुपर्छ,’ उनले भने ।

गठबन्धनको विपक्षमा नबोल्न र कुनै शंका नगर्न उनले कांग्रेस कार्यकर्तालाई निर्देशन दिए । निर्देशन विपरीत गरे कारबाही गर्ने सभापति देउवाले चेतावनी दिए ।