अश्विन दानी, पोखरा । यातायात व्यवस्था कार्यालयबाट सवारी चालक अनुमति पत्र (लाइसेन्स) बनाउँदा लिखित परीक्षा र ट्रायल पास गराइदिने भन्दै सेवाग्राहीसँग घुस लिने दुई जना पक्राउ परेका छन् । सोमबार (हिजो) सेवाग्राहीहरुसँग घुस लिँदै गर्दा पोखरा महानगरपालिका वडा नम्बर १७ स्थित बार्दली रेस्टुरेन्ट एण्ड बारबाट ४० हजारसहित दुई जना पक्राउ परेका हुन् ।

अख्तियार दुरुपयोग अनुसन्धान आयोग पोखराबाट खटिएको टोलीले हेभी इक्विपमेन्ट डिभिजन कार्यालय पोखरा, कास्कीका द्वितीय अपरेटर कुमार लामिछाने र मेट्रो ड्राइभिङ इन्स्टिच्युट, पोखराका सञ्चालक खगेन्द्र प्रसाद काफ्लेलाई ४० हजार घुससहित पक्राउ गरेको जनाएको छ ।

काफ्लेले यस अघि नै विभिन्न सेवाग्राहीसँग लिखित परीक्षा र ट्रायल पास गराइदिने भन्दै लिएको १ लाख ६ हजार रुपैँया र डायरीलगायत प्रमाणहरु बरामद गरेको अख्तियार स्रोतले जनाएको छ ।