काठमाडौँ । नेपाली राष्ट्रिय क्रिकेट टोलीले पहिलो एकदिवसीय अन्तराष्ट्रियमा पपुवा न्युगिनी (पीएनजी) लाई पराजित गरेको छ ।

ओमानको अल अमिरात क्रिकेट मैदानमा भएको पहिलो खेलमा नेपालले पीएनजीलाई २ विकेटले पराजित गरेको हो ।

एक सय ३५ रनको सामान्य लक्ष्य पाएको नेपालले ८२ रन बनाउँदा ७ विकेट गुमाएसँगै संकटमा परेको थियो । तर रोहित पौडेल र सोमपाल कामीबीच आठौं विकेटका लागि ५२ रनको साझेदारी भएसँगै नेपालले ३९ ओभर ३ बलमा ८ विकेट गुमाएर जित हासिल गरेको हो । रोहितले ४१ तथा सोमपालले अविजित २२ रन बनाए । त्यस्तै डेब्यु खेलाडी आशिफ शेखले ३० रन जोडे ।

यसअघि नेपालको उत्कृष्ट बलिङका कारण पीएनजी ३३ ओभरमा अलआउट हुँदै १ सय ३४ रनमा सिमित हुन पुग्यो । लिगा सिआकाले सर्वाधिक ३० रन बनाएको इनिङ्सलाई सस्तैमा समेट्ने क्रममा सन्दीप लामिछानेले ४ विकेट लिए । डेब्यु खेलाडी बिक्रम सोब र कुशल मल्लले २÷२ तथा सोमपालले १ विकेट लिए ।

यस जितसँगै दुई खेलको सिरिजमा नेपालले १–० को अग्रता बनाएको छ । नेपाल र पीएनजीबीचको दोस्रो खेल शुक्रबार हुनेछ ।

आईसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिज अघि नेपालले पीएनजीसँग दुई खेलको सिरिज खेलिरहेको हो ।

नेपाल, ओमान र अमेरिका सम्मिलित त्रिकोणात्मक श्रृंखला भदौ २८ गतेदेखि शुरु हुनेछ ।