काठमाडौँ । एभीसी सेन्ट्रल जोन भलिबल च्याम्पियनशिपमा नेपाली पुरुष टोलीले पहिलो जित निकालेको छ ।

बंगलादेशको ढाकामा शुक्रबार भएको खेलमा उज्वेकिस्तानलाई ३–१ को सेटमा हराउँदै नेपालले पहिलो जित निकालेको हो ।

नेपालले पहिलो सेट २५–१८ ले हारे पनि लगातार तीन सेटमा विजयी भएको हो । नेपालले दोस्रो सेट २५–२१, तेस्रो सेट २५–२१ र चौथो सेट २५–२३ ले जित्यो ।

खेलमा नेपालका धन बहादुर प्लेयर अफ दि म्याच चुनिए ।

यस अघि बिहीबार भएको पहिलो खेलमा नेपाल आयोजक बंगलादेशसँग ३–० को सोझो सेटमै पराजित भएको थियो ।

अब नेपालले तेस्रो खेलमा आज शनिबार श्रीलंकासँग प्रतिस्पर्धा गर्नेछ । नेपाल र श्रीलंकाबीचको खेल दिउसो ५:४५ बजे सुरु हुनेछ ।

यस्तै, नेपालको महिला टोलीले आज आयोजक बंगलादेशको सामना गर्नेछ । नेपाल र बंगलादेशबीचको खेल बिहान ९:१५ बजे सुरु हुनेछ ।

महिलातर्फ नेपालले लगातार दोस्रो जित निकालेको छ ।

शुक्रबार नेपालले माल्दिभ्सलाई ३–० को सेटमा हराएर लगातार दोस्रो जित निकालेको हो ।

महिलाको पहिलो खेलमा नेपालले श्रीलंकालाई ३–२ को सेटमा हराएको थियो ।

प्रतियोगितामा पुरुषतर्फ ५ र महिलातर्फ ६ राष्ट्रको सहभागिता रहेको छ ।

पुरुषमा आयोजक बंगलादेश, नेपाल, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

महिलामा आयोजक बंगलादेश, नेपाल, किर्गिस्तान, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ ।

यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्नेछ ।