पोखरा । नेकपा एमालेनिकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) कास्कीको अध्यक्षमा सन्तोष पोखरेल निर्वाचित भएका छन् ।

संगठनको शनिबार बिहान सम्पन्न २३ औं जिल्ला सम्मेलनमार्फत पोखरेल सर्वसम्मत अध्यक्ष चुनिएका हुन् । अध्यक्षसहित सबै कमिटी नै सर्वसम्मत चयन गरिएको निर्वाचन मण्डलका अध्यक्ष एवं अनेरास्ववियु केन्द्रीय सचिव आशिर्वाद सुवेदीले जानकारी दिए ।

उपाध्यक्षमा शिव पराजुली र कुशल बराल, सचिवमा विजय भुजेल, सहसचिवमा विवेश ओझा, रमिला पौडेल, अर्कीट पुरी र आशिष बगाले, कोषाध्यक्षमा रवि क्षेत्री निर्वाचित भए । ४१ सदस्यीय कमिटीमा ३० जना सदस्य पनि निर्वाचित भएका छन् । बाँकी २ जना सदस्य संगठनको बैठकले पछि मनोनित गर्ने नवनिर्वाचित उपाध्यक्ष शिव पराजुलीले जानकारी दिए ।

२०७० सालमा भएको २२ औं सम्मेलनले विवेक देवकोटालाई अध्यक्ष चयन गरेको थियो । त्यसपछि नेकपा माओवादी केन्द्रसँग पार्टी एकता भएपछि संगठनको सम्मेलन नियमित हुन सकेन । २०७८ माघमा विवेक देवकोटा नेतृत्वमा अनेरास्ववियु जिल्ला कमिटी कास्कीको भेलाबाट विजय पौडेल नेतृत्वमा अनेरास्ववियु जिल्ला कमिटी आयोजक कमिटी गठन भएको थियो । पौडेलको २ वर्षे कार्यकाल सकिएपछि २०७९ माघमा सन्तोष पोखरेल नेतृत्वमा आयोजक कमिटी गठन भयो । पोखरल अध्यक्ष रहने गरी नयाँ कमिटी बनेसँगै अनेरास्ववियु कास्कीले सम्मेलनमार्फत ८ वर्षपछि नेतृत्व पाएको छ ।

२३ औं सम्मेलनका प्रमुख अतिथि संगठनका केन्द्रीय महासचिव नरेश रोकाया थिए । उनले अब विद्यार्थीले गलत प्रवृत्तिविरुद्ध आन्दोलनसँगै रचनात्मक काम पनि गर्नुपर्ने बताए ।