बैतडी । सोमबार बेलुका आएको हावाहुरी र असिनापानीका कारण बैतडीमा एक जना घाइते भएका छन् । विभिन्न ठाउँमा भौतिक क्षति पुगेको प्रहरीले जनाएको छ ।

हुरीले सिँगास गाउँपालिका– २ मैतडका विष्णु बोहराको दुईतले जस्तापाताले छाएको घरको छाना उडाएको छ । छाना उडाउँदा जस्तापाताले लागेर घरभित्र रहेका १४ वर्षीय टेकेन्द्र बोहरा घाइते भएको जिल्ला प्रहरी कार्यालय बैतडीले जनाएको छ । टेकेन्द्रको टाउकोमा चोट लागेको छ ।

प्रहरीका अनुसार सिँगास– ५ खैरकोट, सल्याली, ढुङ्गाडका केही घरमा पनि हुरीले क्षति पुगेको छ । पाटन नगरपालिका– ८ धारीमा एकतले जस्तापाताले छाएको सामुदायिक भवनको छानो उडाएको छ । उक्त भवनको छानो उडेर नजिकै रहेको विनोद महराको घरबाहिर बाँधेको पाडोलाई लागेर मरेको प्रहरीले जनाएको छ ।

हुरीले रुख ढल्दा डिलाशैनी गाउँपालिका– ६ नेगाउस्थित निङ्लासैनी आधारभूत विद्यालयको शौचालयमा क्षति पुगेको छ । हुरीका कारण सडकमा रुख ढलेर महाकाली राजमार्ग पनि अवरुद्ध बनेको थियो ।

असिनापानीले फलफूल र तरकारीमासमेत क्षति पुगेको छ । हुरीका कारण विद्युत् सेवा पनि अवरुद्ध भएको प्रहरीले जनाएको छ ।