काठमाडौँ । काठमाडौँबाट २ करोड १ लाख भन्दा बढी रकम बराबरको सुन, हिरा तथा पत्थरको गहनासहित ४ जना भारतीय नागरिक पक्राउ परेका छन् ।

पक्राउ पर्नेमा भारत, कलकत्ता घर भइ हाल काठमाडौँ महानगरपालिका– २२ बस्ने ४३ वर्षीय हरिवोर सेख, ३९ वर्षीय सुर्यजित दास, ४० वर्षीय तमल साद्रा र १६ वर्षीय समिम सेख रहेका छन्।

उनीहरुलाई गत सोमबार साढे ८ बजे काठमाडौँ उपत्यका प्रहरी कार्यालय रानीपोखरी, जिल्ला प्रहरी परिसर, काठमाडौँ तथा प्रहरी वृत्त जनसेवा समेतबाट खटिएको संयुक्त प्रहरी टोलीले पक्राउ गरेको हो ।

प्रहरीका अनुसार काठमाडौँ– २२ प्युखा कृष्णचोक स्थित हविवुल सेखले मुन्ना जेम एण्ड ज्वेलर्स सञ्चालन गरी विल भरपाई नभएका सुन चाँदी तथा हिराका गरगहना बिक्री वितरण गरिरहेका थिए ।

सोही सूचनाको आधारमा प्रहरीले मुन्ना जेम एण्ड ज्वेलर्समा खानतलासी गर्दा विल भरपाई बिनाका २ करोड १ लाख ७८ हजार ३ सय ६० रुपैयाँ बराबरको रकमका सुन, हिरा तथा पत्थरका गरगहना बरामद गरेको हो।

पक्राउ परेका उनीहरूलाई आवश्यक कारबाहीको लागि राजस्व अनुसन्धान विभाग पठाइएको प्रहरीले जनाएको छ ।