स्याङ्जाको बिरुवा गाउँपालिका वडा नं. ६ चिन्नेवासमा निर्माण गरिएको बिरुवा आधारभूत अस्पताल औपचारिक रूपमा सञ्चालनमा आएको छ । आइतबार आयोजित कार्यक्रममा गण्डकी प्रदेशका स्वास्थ्य मन्त्री कृष्णप्रसाद पाठकले अस्पतालको उद्घाटन गर्दै सेवा विस्तारका लागि प्रदेश सरकार पूर्ण रूपमा सहयोग गर्न तत्पर रहने प्रतिबद्धता जनाए ।

उद्घाटन कार्यक्रमलाई सम्बोधन गर्दै मन्त्री पाठकले ग्रामीण क्षेत्रमा गुणस्तरीय स्वास्थ्य सेवा पुर्‍याउन अस्पताल महत्वपूर्ण आधार बन्ने बताए । अस्पतालले ओपीडी, आकस्मिक सेवा, एक्स–रे, भिडियो एक्स–रे, सिबिसी, एलएफटी, आरएफटीलगायतका प्रयोगशाला परीक्षण सेवा नियमित रूपमा सुरु गरेको गाउँपालिकाले जनाएको छ ।

गाउँमै स्वास्थ्य चेतना वृद्धि, सहज पहुँच र आपतकालीन अवस्थामा तत्काल उपचार सुनिश्चित गराउन अस्पतालले महत्वपूर्ण भूमिका खेल्ने गाउँपालिकाका अध्यक्ष सूर्य बहादुर कुँवरले बताए । “स्वस्थ नागरिक नै विकासको मेरुदण्ड हो, अस्पताललाई आधुनिक उपकरण र दक्ष जनशक्तिबाट अझ सुदृढ बनाउँदै लैजानेछौँ,” अध्यक्ष कुँवरले भने । अस्पताल सञ्चालनमा आएपछि सामान्य उपचारका लागि पोखरा वा अन्य शहर धाउनुपर्ने बाध्यता अन्त्य भएको उनको भनाइ छ ।

सञ्चालनमा आएको अस्पतालको भवन साबिक चिन्नेवास गाविसका स्थानीयहरू संगठित भएर स्थापना गरेको “सामाजिक विकासका लागि सहयोगी हातहरू” नामक संस्थाले निर्माण गरी चिन्नेवास स्वास्थ्यचौकीलाई हस्तान्तरण गरेको थियो । त्यसै भवनलाई आवश्यक भौतिक पूर्वाधार थपेर अस्पतालका रूपमा विकास गरिएको गाउँपालिकाले जनाएको छ ।

गाउँपालिकाले गत आर्थिक वर्षमा आवश्यक थप पूर्वाधार निर्माण गरी १० बेड क्षमताको यो अस्पताल सञ्चालनमा ल्याएको हो । करिब सात रोपनी क्षेत्रफलमा फैलिएको अस्पताल सहयोगी संस्था र पालिकाको संयुक्त लगानीमा एक करोड ७४ लाख ८० हजार रुपैयाँ खर्च गरेर निर्माण भएको हो ।

अस्पतालमा हाल एमबीबीएस डाक्टर, रेडियोग्राफर सुपरभाइजर, हेल्थ असिस्टेन्ट, ल्याब टेक्निसियन, स्टाफ नर्स, अनमी, अहेव र फार्मेसी सुपरभाइजरसहित नौ जना स्वास्थ्यकर्मी कार्यरत रहेको प्रमुख प्रशासकीय अधिकृत पर्शुराम पोखरेलले जानकारी दिए । आकस्मिक सेवा, गर्भवती महिला तथा बालबालिकाको उपचार गाउँमै उपलब्ध भएपछि जनजीवनमा सहजता आएको उनले बताए ।

गाउँपालिकाले आगामी वर्ष अस्पतालमा अल्ट्रासोनोग्राफी तथा दन्त सेवा थप्ने तयारी गरेको छ । यसले बिरुवाबासीको स्वास्थ्य क्षेत्रमा दीर्घकालीन सकारात्मक प्रभाव पार्ने अपेक्षा गरिएको छ ।