संघीय सरकारले देशभर वैशाख १५ गतेदेखि विद्यार्थी भर्ना र २१ गतेबाट पठनपाठन सुरु गर्ने निर्णय गरे पनि स्याङ्जाको फेदीखोला गाउँपालिकाले आफ्नै तालिका अघि सारेको छ । गाउँपालिकाले वैशाख २ गतेदेखि नै विद्यार्थी भर्ना अभियान सुरु गर्ने निर्णय गरेको हो ।

गाउँपालिकाका अनुसार वैशाख २ देखि ७ गतेसम्म भर्ना अभियान सञ्चालन गरिनेछ भने वैशाख ९ गतेबाट नियमित कक्षा सञ्चालनमा ल्याइनेछ । शुक्रबार बसेको गाउँकार्यपालिकाको बैठकले उक्त निर्णय गर्दै आवश्यक तयारी तीव्र बनाउन सम्बन्धित निकायलाई निर्देशन दिएको हो ।

गाउँपालिका अध्यक्ष घनश्याम सुवेदीले स्थानीय आवश्यकताका आधारमा शैक्षिक गतिविधि अघि बढाइएको बताए । “हामीले स्थानीय अवस्था र विद्यार्थीको हितलाई ध्यानमा राखेर आफ्नै शैक्षिक क्यालेन्डर अनुसार अघि बढ्ने निर्णय गरेका हौँ,” उनले भने, “यसले शैक्षिक सत्र व्यवस्थित र प्रभावकारी बनाउन सहयोग पुग्ने अपेक्षा गरेका छौँ ।”

गाउँपालिकाले शिक्षा शाखामार्फत वार्षिक शैक्षणिक योजना तयार गरी सबै विद्यालयमा पठाउने तयारी पनि गरेको जनाएको छ । सोही योजनाअनुसार विद्यालयहरू सञ्चालनमा ल्याइनेछ ।

यस्तै, गाउँपालिकाले शिक्षा मन्त्रालयबाट जारी परिपत्रप्रति ध्यानाकर्षण गराउँदै आधारभूत तथा माध्यमिक शिक्षा स्थानीय तहको एकल अधिकार भएको उल्लेख गरेको छ । अध्यक्ष सुवेदीका अनुसार संविधान र कानुनले दिएको अधिकारअनुसार स्थानीय तहले आफ्नो सन्दर्भअनुसार शैक्षिक नीति कार्यान्वयन गर्नुपर्नेमा जोड दिइएको छ ।

“शिक्षा जस्तो संवेदनशील क्षेत्रमा निर्णय गर्दा स्थानीय तहसँग पूर्वपरामर्श आवश्यक हुन्छ,” उनले भने, “हामी संघीय सरकारलाई स्थानीय आवश्यकता अनुसार निर्णय गर्न दिन, परिपत्रलाई मार्गनिर्देशकका रूपमा मात्रै लिन र तीन तहबीच समन्वय अझ सुदृढ बनाउन आग्रह गर्छौँ ।”

फेदीखोला गाउँपालिकाको यस निर्णयलाई स्थानीय स्तरमा चासोका साथ हेरिएको छ ।