पोखरा महानगरपालिका–२५ हेम्जा आलु खेतीका लागि प्रसिद्ध छ । हेम्जाको कुल १३ हजार ५ सय हेक्टर क्षेत्रफलमध्ये ५ सय ५० हेक्टरमा आलु खेती गर्ने गरिन्छ । त्यहाँका २ हजार घरपरिवार कृषिमा आधारित रहेकोमा १ हजार ५० कृषकले व्यावसायिक आलु खेती गर्दै आएका छन् ।

‘सुन्दर ठाउँ हेम्जा आलु खेतीका लागि प्रसिद्ध छ जाउँ, आलुका स्वादिष्ट परिकार खाउँः आलु एक परिकार अनेक’ भन्ने मूल नाराका साथ विष्णु पादुका क्लबको आयोजनामा अहिले हेम्जामा १३औँ संस्करणको राष्ट्रिय हेम्जा आलु महोत्सव चलिरहेको छ ।

हेम्जामा आलु खेतीको बढ्दो विस्तारसँगै यसको विशिष्टीकृत पहिचानमा सहयोग पु¥याउने लक्ष्यका साथ विगत १३ वर्ष यता लगातार आलु महोत्सव गर्दै आइएको आयोजक विष्णु पादुका क्लबका अध्यक्ष वसन्तकुमार श्रेष्ठले जानकारी दिए ।

किसनले कार्तिकमा लगाएर चैत्रसम्म आलु भित्राउने गरेको हेम्जाका कृषक जयराम तिमिल्सिनाले बताए । उनकाअनुसार हेम्जामा हिउँदे आलुको मात्रै खेती गरिन्छ । सहज बाटो र यातायातको पहुँच भएकाले हेम्जाको आलु बजार पुग्न सजिलो भएको तिमिल्सिनाले सुनाए ।

महोत्सव स्थलमा अहिले ४० क्विन्टल आलु राखिएको छ । महोत्सव अवधिभर आलु प्रतिकेजी ४२ रुपैयाँमा किन्न सकिन्छ । महोत्सव वैशाख ३ गतेसम्म चल्नेछ ।