धनुषा । धनुषामा आफ्नै आमाले विष खुवाउँदा तीन छोराछोरीको मृत्यु भएको छ। आमाको अवस्था पनि गम्भीर रहेको प्रहरीले जनाएको छ ।

सहिदनगर नगरपालिका–५ बासुदेवपट्टी बस्ने सुशीलकुमार साहकी श्रमती २५ वर्षीया पत्नी बबिताकुमारी साहले सोमबार साँझ साढे ६ बजेतिर आफ्नै तीन जना छोराछोरीलाई विष खुवाएर आफूले पनि खाएकी हुन्।

विष सेवनबाट उनका ६ वर्षीय छोरा आदित्य साह, ४ वर्षीय छोरी आकृति साह र २ वर्षीय छोरी आरुसी साहको मृत्यु भएको धनुषा प्रहरीले जनाएको छ।

प्रहरीका अनुसार विषादी सेवनबाट गम्भीर अवस्थामा पुगेकी बबिताको प्रादेशिक अस्पताल जनकपुरमा उपचार भइरहेको छ। उनको अवस्था गम्भीर भएकाले भेन्टिलेटरमा राखेर उपचार भइरहेको छ ।

गर्भवतीसमेत रहेकी बबिताको पेटमा रहेको ९ महिनाको बच्चा (छोरा)लाई अप्रेसन गरी जीवितै उद्धार गरिएको छ।

घरायसी विवादका कारण बबिताले छोराछोरीलाई खानामा विष मिसाएर खुवाएको र आफूले पनि खाएको प्रहरीको प्रारम्भिक अनुसन्धानको क्रममा खुल्न आएको धनुषा प्रहरीले जनाइएको छ।

घटनाका बारेमा थप अनुसन्धान भइरहेको प्रहरीले जनाएको छ।