पोखरा । देशका विभिन्न क्षेत्रमा शुक्रबार रातिको हावाहुरीसहितको वर्षाले वितण्डा मच्चाएको छ ।

शुक्रबार तीन जनाको मृत्यु भएको छ भने १० जना घाइते भएका छन् । साथै दर्जनौँ घर तथा भौतिक संरचनामा क्षति पुर्‍याएको प्रहरीले जनाएको छ ।

प्रहरीका अनुसार हावाहुरीले रुख ढाल्दा च्यापिएर पश्चिम नवलपरासीको सुनवलमा दुई जनाको मृत्यु भएको छ ।

रुखले च्यापेर सुनवल– ७ निवासी ३० वर्षीया मिरा बयम्बु र सोही वडाका ४० वर्षीय दुर्गाबहादुर पुनको मृत्यु भएको इलाका प्रहरी कार्यालय सुनवलले जनाएको छ ।

प्रहरीका अनुसार शुक्रबार हावाहुरीसहित आएको पानीबाट जोगिन उनीहरू प्रतिक्षालयमा ओत लागेका थिए । प्रतिक्षालयमाथि नै रुख ढलेपछि मृत्यु भएको हो ।

रुखले च्यापेर तीन जना घाइते भएका छन् । घाइते हुनेमा स्थानीय नरमा परियार, दुर्गा खाम्चा र एकजनाको परिचय नखुलेको प्रहरीले जनाएको छ ।

घाइतेलाई उपचारका लागि देवदह मेडिकल कलेज पठाइएको छ ।

यसैगरी शुक्रबार बिहान कैलालीमा पनि हावाहुरीले ढालेको रुखले लागेर राष्ट्रिय माध्यमिक विद्यालय सुखडका प्राचार्य कर्णबहादुर भण्डारीको मृत्यु भएको थियो ।
यस्तै, बारामा एक, कैलालीमा दुई, कञ्चनपुरमा एक जना घाइते भएका छन्। उनीहरुको विभिन्न अस्पतालमा उपचार भइरहेको छ ।

यता उदयपुरमा पनि दर्जनौँ घर तथा विद्यालयमा क्षति पुगेको छ । जिल्ला प्रहरी कार्यलयका अनुसार जिल्लाको चौदण्डीगढी नगरपालिका– १० खैराहा झोडामा हावाहुरीका कारण स्थानीय हर्क श्रेष्ठको घर, ध्रुव खत्री, सम्भव अधिकारीको घरको छानो उडाएको छ ।

उदयपुरगढी गाउँपालिका–६ को जगेटारस्थित माध्यमिक विद्यालयको सबै छानो हावाहुरीले उडाएको छ । त्रियुगा नगरपालिका क्षेत्रसहित चौदण्डीगढी नगरपालिका र उदयपुरगढी गाउँपालिकामा हावाहुरीले दर्जनौँ घर तथा भौतिक संरचनामा क्षति पुर्‍याएको प्रहरीले जनाएको छ ।