पोखरा । सांगीतिक कार्यक्रमका लागि रुकुम पश्चिम पुगेकी गायिका रचना रिमाल बिरामी परेकी छन् । उनलाई नेपाली सेनाको हेलिकोप्टरमार्फत् उद्धार गरेर काठमाडौँ लगिएको थियो ।

अहिले उनको धुम्बाराहीस्थित ह्याम्स अस्पतालको आकस्मिक कक्षमा उपचार भइरहेको छ । अस्पताल स्रोतले अहिले जाँचको काम चलिरहेको र रिपोर्ट केही समयपछि आउने बताएको छ ।

रुकुम पश्चिमको सानीभेरीस्थित बेलटापुमा सञ्चालन भइरहेको महोत्सवमा प्रस्तुति दिन रिमाल सोमबार बेलुका त्यहाँ पुगेकी थिइन् । तर, मंगलबार बिहान उनी एक्कासी बिरामी परेकी आयोजकले जनाएका छन् ।

सुरूमा रचनालाई चौरजहारीस्थित मिसन अस्पतालमा प्राथमिक उपचार गरिएको थियो । त्यसपछि नेपाली सेनाको हेलिकोप्टरमार्फत् उद्धार गरेर नेपालगञ्ज हुँदै काठमाडौँ गरिएको हो ।

रचना केही दिनदेखि कर्णालीका विभिन्न जिल्लामा भइरहेका सांगीतिक कार्यक्रममा सहभागी भएकी थिइन् । रुकुम जानुअघि रचनाले सुर्खेतमा प्रस्तुति दिएकी थिइन् भने त्यसअघि उनले मुगु पुगेकी थिइन् ।