काठमाडौं । काठमाडौंको ग्राण्डी अस्पताल नजिकैको सडकबाट खोलामा खसेको कारलाई विष्णुमतीको बाढीले बगायो।

गएराति १० बजे बागमती प्रदेश ०१–०३१ च ६१४१ नम्बरको ईभी कार ग्राण्डिबाट बानियाटारसम्म करिब डेढ किलोमिटर कार बगेको हो ।

उक्त कारमा सवार दाङ घर भइ टोखा बस्ने ३४ वर्षीया भावना वलीको भने प्रहरीले सकुशल उद्धार गरेको छ ।

कार बग्दै बानियाटार पुलमा आएर अड्किएपछि प्रहरी र स्थानीयको सहयोगमा उद्धार गरिएको काठमाडौं प्रहरी परिसरले जनाएको छ ।

सो कारले नम्बर नखुलेको भाडा कारलाई साइड दिने क्रममा ईभीगाडी माटोमा भासिएर खोलामा खसेको थियो ।

कार कञ्चनपुरको शुक्लाफाँटा नगरपालिका वडा नम्बर–१ घर भई हाल काठमाडौंको धुम्बाराही बस्ने ३५ वर्षीय अंकुश सिंहले चलाएका थिए । चालक भने तत्काल गाडीबाट खोला किनारामा हाम फालेका थिए ।

उद्धार गरिएकी महिला र उद्धारको क्रममा घाइते भएका व्यक्तिहरूको ग्रिनसिटी अस्पतालमा उपचार भइरहेको छ ।