कर्णाली । जुम्लाको तातोपानी गाउँपालिका– ८ राक्सेस्थित पाटनमा पहिरो जाँदा १३ वटा भेडा पुरिएका छन्।

सोमबार दिउँसो ४ः०० बजेको समयमा पाटनमा चरिरहेका भेडालाई पहिरोले पुरेको हो।

वर्षाका कारण आएको पहिरोले पुरिएर १३ भेडा र एक घोडा मरेको भेटिएको प्रहरीले जनाएको छ ।

प्रहरीका अनुसार कुहिरोले ढाकिएकोले कति भेडा तथा घोडा मरेको भन्ने यकिन हुन सकेको छैन । कृषकहरूले भने आआफ्ना भेडा जम्मा गरिरहेका छन् । घटनास्थल करिब ८ घण्टा पैदल यात्रा हिँड्नुपर्दछ ।

घटनास्थलमा ताम्ती टोप्लाका प्रहरी इन्चार्ज प्रहरी सहायक हवल्दार गणेशबहादुर बलायरको नेतृत्वमा स्थानीयसहित सुरक्षा टोली पुगिसकेको छ। तातोपानी गाउँपालिका वडा नं ७ जुम्लाका स्थानीय भेडापालक कृषक टेकराज रावतले आफूसहित आठ जना कृषकका भेडाहरू चरिरहेको अवस्थामा माथिबाट ठूलो पहिरो खसेर पुरेको बताए।

उक्त गाउँपालिका वडा नं ७ का वडाध्यक्ष तिलक रावतले पहिरोले धेरै भेडा मरेको भन्ने खबर आए पनि क्षतिको यकिन विवरण आउन समय लाग्ने बताएका छन् ।