पोखराको पालिखेचोकस्थित प्रतिभा माविमा आयोजित एकदिने विज्ञान प्रदर्शनीमा कक्षा ११, विज्ञान संकाय, सेक्शन एका विद्यार्थीद्वय दिक्षान्त लालचन र लिलेश श्रेष्ठले निर्माण गरेको सर्भिङ रोबोट सर्वोत्कृष्ट ठहरिएको छ । जुन टीमले २० हजार नगद जित्न सफल भयो ।

विद्यालयले प्रकाशन गरेको नतिजा अनुसार सेक्सन एचका सुस्मित पौडेल, शुशान्त पौडेल र सुशान्त सिग्देलले बनाएको एयरक्राफ्ट फस्र्ट रनरअप बन्दै १५ हजार जित्न सफल भयो ।

कक्षा १२, विज्ञान संकाय, सेक्शन एचका सजन रावल, आशिष सुवेदी र सञ्जय विकले निर्माण गरेको अटोमेटेट कार पार्किङ सिस्टम सेकेण्ड रनरअप बन्दै ७ हजार ५ सय जित्यो ।

यसैगरी, सोहि सेक्शनका सुलभ रेग्मी र डार्विन ढकालले उत्पादन गरेको वेस्ट टु इनर्जी नामक फोहोरबाट उर्जा बनाउने प्रोजेक्ट थर्ड रनरअप बन्दै ७ हजार ५ सय नै प्राप्त गर्न सफल भयो ।

विद्यालयका प्राचार्य किरण सापकोटाका अनुसार कक्षा ४ देखि १२ सम्मका विद्यार्थीले तयार पारेका विज्ञान विषयसँग सम्बन्धित प्रोजेक्टहरु प्रदर्शनीमा राखिएको थियो । व्यक्तिगत र समूहगत गरेर करिब ३ सय ५० प्रोजेक्ट विद्यार्थीले तयार पारेका थिए ।

विद्यार्थीमा नयाँ ज्ञानको खोजी गर्नका लागि विज्ञानसँग सम्बन्धित रहेर विभिन्न उपकरण र प्रोजेक्ट तयार पार्न लगाइएको थियो । तिनै सामाग्री र प्रोजेक्टलाई प्रदर्शनमा राखिएको विद्यालयका प्राचार्य सापकोटाले बताए । दसैंतिहारको लामो बिदामा विद्यार्थीलाई विज्ञान विषयसँग सम्बन्धित रहेर विभिन्न सामाग्री तयार पार्न लगाएको र तिनै प्रोजेक्ट प्रदर्शनमा राखेको उनले बताए ।

विद्यार्थीले बनाएका प्रोजेक्टको मुल्यांकन गर्नका लागि प्राडा शोभाकान्त लामिछानेको संयोजकत्वमा शिव देवकोटा र हरि बराल सहितको निर्णायक मण्डल रहेको थियो ।

विद्यालय संचालक समितिका अध्यक्ष नारायण पौडेलले विद्यार्थीको शिक्षालाई व्यावहारिक बनाउनका लागि यस्ता गतिविधिले महत्व राख्ने बताए । पौडेलले भने ‘सानै उमेरमा अनुसन्धानको सोच बढाउन यस्ता गतिविधि सहयोगी बन्छन ।’

विज्ञान विषयका विद्यार्थीका लागि विज्ञान प्रदर्शन कार्यक्रम गरिएको र व्यवस्थापन विषयका विद्यार्थीका लागि बिजनेस योजना बनाउनेबारे प्रतिश्पर्धा गराउने विद्यालयले जानकारी दिएको छ ।

त्यस्तै, होटल व्यवस्थापनका विद्यार्थीका लागि एकदिने फूड फेस्टिबल आयोजना पनि हुनेछ ।

सम्बन्धित समाचारः

प्रतिभा माविमा विज्ञान प्रदर्शनी