आगामी फागुन २१ गते हुने तय गरिएको प्रतिनिधिसभा सदस्य निर्वाचनका कारण माध्यमिक शिक्षा परीक्षा (एसइई) प्रभावित हुने भएको छ ।

जनक शिक्षा सामाग्री केन्द्रले मतपत्र छपाई कार्य सुरु गरेसँगै अगामी चैत पहिलो साता गर्ने तयारी रहेको एसइई परीक्षा कार्यतालिका नै प्रभावित हुने भएको राष्ट्रिय परीक्षा बोर्डका एसइई तर्फका परीक्षा नियन्त्रक टुकराज अधिकारीले बताए ।

उनले निर्वाचनलाई केन्द्रमा राखेर बोर्डले आगामी एसइई परीक्षाको रुटिङ सार्वजनिक गर्ने तयारीमा जुटेको बताए । निर्वाचनले परीक्षा केहि दिन सार्नु पर्ने अवस्था सृजना भएको उनको भनाइ छ ।

बोर्डको क्यालेन्डर अनुसार यो वर्षको एसइई ०८२ चैतको पहिलो सातादेखि सञ्चालन गर्ने तयारी थियो । जनक शिक्षाले प्रश्नपत्र छपाईमा केहि दिन ढिला हुन सक्ने संकेत गरेसँगै एसइई केहि साता सार्नु पर्ने अवस्था आएको नियन्त्रक अधिकारीले बताए ।

यस पटक एसइई परीक्षाको लागि ५ लाख १७ हजारले परीक्षा फारम भरेका छन् ।