इटहरी । पत्रकारकाे नाकको डाँडी भाँच्नका लागि १ करोड रुपैयाँ छुट्याएकाे अभिव्यक्ति दिएर विवादित बनेका इटहरी उपमहानगरपालिकाका मेयर द्वारिकालाल चौधरी पुन: विवादमा तानिएका छन् । यही असार ४ गते बुधबार सामाजिक विकृति विरुद्धको कार्यक्रममा चौधरीले प्रयोग गरेको शब्दले पुन: विवादमा तानिएका हुन् ।

इटहरी उपमहानगरपालिकाको महिला सञ्जालले एक विज्ञप्ति नै जारी गरी सम्पूर्ण महिलाको शीर ठाडो नहुने अवस्था सिर्जना भएको बताएको छ। सञ्जालकी अध्यक्ष विमला ढकाल सहित २२ जना महिलाको संयुक्त हस्ताक्षर रहेको विज्ञप्तिमा मेयरले प्रयोग गरेको उक्त भाषाप्रति आपत्ति जनाइएको छ। साथै मेयरको उक्त अभिव्यक्तिले महिलाको अस्मितामा नै आँच आएको भन्दै विरोध जनाइएको छ।

इटहरीमा बढ्दो वेश्यावृत्ति रोक्नका लागि मेयर चौधरीले कार्यक्रममा अशोभनीय शब्द प्रयोग गरेका थिए। उनले पटकपटक इटहरीको लबिपुर चोकलाई ‘र… जिन्दावाद’ भन्दै भाषण गरेका थिए। उनले छतिमा हात राखेर भनेका थिए – ‘मनराेञ्जन गर्न र…डी नै चाहिन्छ, घरभाडामा लगाउन र…डी नै चाहिन्छ, औषधी चलाउन र…डी चहिन्छ, र…डी जिन्दावाद ।’

मेयरकाे उक्त अभिव्यतिपछि महिला सञ्जालले विज्ञप्ति जारी गरी अब कोही पनि चुप लागेर बस्न नमिल्ने जनाएकाे छ । यस्ता शब्दले महिलाहरुलाई शिर ठाडो पाररे हिड्नसमेत गाह्रो भएको महिला सञ्जालको ठहर छ । इटहरी उपमहानगरपालिकाले गरेको सम्पूर्ण सामाजिक विकासका कार्यक्रम अभियानमा सहकार्य गर्ने समेत महिला सञ्जालले जनाएको छ । सामाजिक सञ्जालमा पनि मेयर चाैधरीकाे सर्वत्र आलोचना भइरहेको छ ।