राष्ट्रिय परीक्षा बोर्डले २०७७ सालको माध्यमिक शिक्षा परीक्षा (एसईई) को नतिजा आज सार्वजनिक गरेकोछ। कोरोनाभाइरसको महामारीका बिच भौतिकरुपमा परीक्षा सञ्चालन हुन नसकेपछि विद्यालयले गरेको आन्तरिक मूल्यांकनलाई बोर्डले प्रमाणित गरेर नतिजा प्रकाशन गरिएको हो।

परीक्षा नियन्त्रण कार्यालय कक्षा १० ले एसईई परीक्षा २०७७ को नतिजा बोर्डको वेबसाइटसहित अन्य वेबसाइटहरु, एसएमएस र आईभीआरबाट हेर्न सकिने गरी प्रकाशन गरेको छ ।

बोर्डले २०७७ सालको नियमित तथा ग्रेडवृद्धि परीक्षाको नतिजा इजी सर्भिस प्रालिबाट ३४९४९, आकाश टेक प्रालिबाट ३१००३, र जानकी टेक्नोलोजी प्रालि मार्फत् ३५००१ मा एसएमएस गरेर हेर्न सक्ने तथा नेपाल टेलिकममार्फत १६०० एनसिएलबाट १६०० मा एसएमएस गरेर थाहा पाउन सक्ने व्यवस्था गरेको छ ।

त्यसैगरी बोर्डले २०७७ को एसईईको नतिजा विभिन्न फर्म र संस्थानबाट समेत सार्वजनिक गर्ने जनाएको छ । बोर्डले आफ्नो आधिकारीक बेवसाइट  www.see.gov.np का साथसाथै, नेपाल टेलिकमको वेबसाइट  www.see.ntc.net.np, द कनसेप्ट प्लस प्रालिको वेबसाइट, इडियु संजालको वेबसाइट, कान्तिपुर डिजिटल कर्प प्रालिको वेबसाइट र एनसेलको वेबसाइटबाट समेत नतिजा हेर्न सकिने उल्लेख गरेको छ।