देशभर २८ हजार सामुदायिक विद्यालय छन्। ती विद्यालयमा प्राथमिक, निम्न माध्यमिक र माध्यमिकका गरि १७ हजार २ सय ३८ शिक्षक पद रिक्त छन् । वर्षौंदेखि शिक्षक पदपूर्ति नहुँदा पठनपाठनमा समस्या हुन थालेपछि शिक्षक सेवा आयोगले सामुदायिक विद्यालयमा खुला प्रतिस्पर्धाका आधारमा शिक्षक छनोट गर्न विज्ञापन गरेको छ । निम्न माध्यमिक तहका लागी बुधबार २५ सय ९८ शिक्षक माग गरिएको छ । अघिल्लो साता माध्यमिक तहका लागि १५ सय ४७ शिक्षक माग गरेको आयोगले प्राथिमिक तहमा १३ हजार ९३ पदको प्राथमिक शिक्षकको लागि विज्ञापन खुलाउने भएको छ ।

मंगलबार बसेको आयोगको बैठकले प्राथमिक तह तृतीय श्रेणी खुलातर्फको विज्ञापन बुधबार खुलाउने निर्णय गरेको आयोगका प्रशासकीय प्रमुख केशवप्रसाद दाहालले जानकारी दिए ।

विज्ञापन भोलिको गोरखापत्रमा र भोलिनै आयोगको वेबसाइटमा अपलोड गरिनेछ । इच्छुकले माघ १४ गतेसम्म नियमित शुल्कमा र माघ २० गतेसम्म अबिलम्ब शुल्कमा परीक्षा आवेदन फाराम भर्न सक्ने आयोगले जनाएको छ ।

विज्ञापनको सामान्य तर्फको परीक्षा आगामी चैत्र २० गते सञ्चालन हुने आयोगले जानकारी दियो । परीक्षा आवेदन फाराम अनलाइनबाटै भर्नुपर्ने छ ।

आयोगले यसअघि नै माध्यमिक तहमा १ हजार ५ सय ४७ र निमावि तहमा २ हजार ५ सय ९८ पदका लागि विज्ञापन गरिसकेको छ ।