पोखरामा जारी प्रथम पीसीएम राष्ट्रिय जुनियर टेनिस प्रतियोगिताको दोस्रो दिन विभिन्न उमेर समूहमा ३० खेल सम्पन्न भएका छन् ।

गण्डकी प्रदेश टेनिस संघ, पोखराको आयोजनामा पोखरा रंगशाला टेनिस कम्प्लेक्समा सञ्चालन भइरहेको प्रतियोगितामा ब्वाइज तथा गर्ल्स एकलतर्फका खेलहरू सम्पन्न भएका हुन्।

यू ८ वर्ष गर्ल्सतर्फ भानी राजभण्डारी र निवेदी सुनारले फाइनलमा स्थान बनाउँदा ब्वाइजतर्फ सहर्ष कायस्थ र रमा अल्वर्टो फाइनलमा पुगेका छन् ।

यू ९ र १० ब्वाइज दुबै तर्फ सोनम टी घले र सर्बज्ञ जंग खत्री फाइनलमा प्रवेश गर्दा यू ९ गर्ल्सतर्फ भानी राजभण्डारी र सेजल राना मगरले उपाधिका लागि स्थान सुरक्षित गरेका छन् । त्यस्तै यू१० गर्ल्सतर्फ निम्ती कुँवर र सहारा कायस्थले फाइनल यात्रा तय गरेका छन् ।

यू  १२ वर्ष गर्ल्सतर्फ सहारा कायस्थले अनन्या गुरुङलाई ६–१, ६–१ ले तथा राजिशा जोशीले सहारा कायस्थलाई ६–१, ६–४ ले पराजित गर्दै फाइनलमा स्थान बनाएका छन् ।

यू १२ वर्ष ब्वाइजतर्फ सहन्श बस्नेतले सबिक पोखरेललाई ६–२, ६–१ ले पराजित गरे। त्यस्तै इभान भट्टराईले अयान पन्तलाई ६–१, ६–१ ले हराउँदै फाइनलमा स्थान पक्का गरेका छन् ।

यू १४ वर्ष गर्ल्सतर्फ बोनी म्याक्लागनले समृद्धि खत्रीलाई ६–२, ७–५ ले पराजित गर्दा राजिशा जोशीले अनन्या गुरुङलाई ६–१, ६–१ ले हराउँदै फाइनलमा प्रवेश गरेकी छन् ।

यू १४ वर्ष ब्वाइजतर्फ आयर्शराज पौडेल र सुरेन्द्र विक तथा सहन्श बस्नेत र अभिषेक बयलकोटीले आ–आफ्ना खेल जित्दै सेमिफाइनलमा स्थान बनाएका छन् ।

यू १६ वर्ष ब्वाइजतर्फ सुरेन्द्र बीकेले अभिषेक बयलकोटीलाई ६–०, ६–१ ले पराजित गरे । आर्यश राज पौडेलले अभिषेक बीकेलाई ६–३, ६–३ ले हराउँदै फाइनलमा स्थान सुरक्षित गरेका छन् ।

यू १८ वर्ष ब्वाइजतर्फ शाश्वत बज्राचार्यले अभिषेक बीकेलाई ६–३, ६–२ ले पराजित गरे भने सन्दीप बीकेले सुरेन्द्र बीकेलाई ७–६, ६–३ ले हराएका छन् ।

प्रतियोगितामा विभिन्न उमेर समूहका खेलाडीहरूको उत्साहजनक सहभागिता रहेको छ । दोस्रो दिनका खेलसँगै प्रतियोगिताको प्रतिस्पर्धा थप रोमाञ्चक बनेको आयोजक गण्डकी प्रदेश टेनिस संघले जनाएको छ ।