गण्डकी प्रदेश टेनिस संघको आयोजनामा पोखरा रंगशाला टेनिस कम्प्लेक्समा प्रथम पीसीएम राष्ट्रिय जुनियर टेनिस प्रतियोगिता तेस्रो दिन पनि जारी रहेको छ ।

पोखरा रंगशाला टेनिस कम्लेक्समा जारी प्रतियोगिताको यू १४ ब्वाइज सिंगल्सतर्फ आयर्शराज पौडेल र अभिषेक बयलकोटी शिर्ष स्थानका लागि भिड्ने भएका छन् भने यू१८ तर्फको शिर्ष स्थानका लागि सन्दिप विकले शाश्वत बज्रचार्यको सामना गर्ने भएका छन् ।

यू–१४ ब्वाइज सिंगल्समा आर्यश राज पौडेलले अनमोल सार्कीलाई ६–१, ६–१ ले पराजित गरी फाइनलमा स्थान बनाउँदा तथा अभिषेक बयलकोटीले सहंश बस्नेतलाई पराजित गर्दै फाइनलमा स्थान बनाएका हुन् ।

यस्तै यू–१६ ब्वाइज सिंगल्समा सुरेन्द्र बीकले फाइनल खेलमा आर्यश राज पौडेललाई ६–३, ६–३ को सोझो सेटमा पराजित गर्दै विजेता बनेका छन् ।

आइतबार सम्पन्न खेलमा यू–८ गर्ल्स सिंगल्सतर्फको फाइनलमा वाणी राजभण्डारीले निवेदी सुनारलाई १०–१, १०–० ले पराजित गरिन् भने यू–८ ब्वाइज सिंगल्समा रामा अल्बर्टोले सहर्ष कायस्थलाई ११–९, १०–७ ले फाइनलमा हराए ।

यू–९ ब्वाइज सिंगल्समा सवज्र्ञ जंग खत्रीले सोनम टी घलेलाई फाइनलमा ४–२, ४–१ ले पराजित गरे भने यू–९ गर्ल्स सिंगल्समा वाणी राजभण्डारीले सेजल राना मगरलाई ४–१, ४–१ को सोझो सेटमा पराजित गरिन् ।

त्यस्तै यू–१० गर्ल्स सिंगल्समा निम्ती कुँवरले सहारा कायस्थलाई ६–१, ६–३ ले पराजित गर्दा सोनाम घलेले सर्वज्ञजङ खत्रीलाई पराजित गरी विजेता बने ।

यू–१२ ब्वाइज सिंगल्समा सहंश बस्नेतले इभान भट्टराईलाई ६–१, ६–१ ले पराजित गर्दै बिजेता बन्दा यू–१२ गर्ल्स सिंगल्समा निम्ती कुँवरले राजिशा जोशीलाई ६–४, ६–१ ले पराजित गर्दै पहिलो भइन् ।

यू–१४ गर्ल्स सिंगल्समा बोनी एस म्याक्लागन उपस्थित नभएपछि राजिशा जोशी वाकओभरमार्फत विजेता घोषित भएकी छन् ।

आइतबार सम्पन्न फाइनल खेलका विजेता तथा उपविजेता खेलाडीहरुलाई गण्डकी प्रदेश टेनिस संघले गिफ्ट ह्याम्पर, मेडल तथा प्रमाणपत्र वितरण गरेको छ ।

प्रतियोगिताले नेपालका युवा टेनिस खेलाडीलाई राष्ट्रिय स्तरमा आफ्नो प्रतिभा प्रदर्शन गर्ने अवसर प्रदान गर्नुका साथै जुनियर टेनिसको विकासमा योगदान पुर्‍याउने आयोजकले जनाएको छ ।