पछिल्लो समय चलचित्रमा अभिनय गरेर स्थापित हुँदै गएकी २१ वर्षीया नायिका रुपा थापा मगरको बिहेको दुलान फर्काएर घर फर्किरहेका बेला स्कुटर दुर्घटनामा ज्यान गएको छ ।

उनका श्रीमान् २७ वर्षीय महेश पुन गम्भीर घाइते भएका छन् । मृतक थापाले मगरले चलचित्र लर्फु (पछ्यौरी) मा नायिकाको रुपमा अभिनय गरेकी थिइन् भने पाल्पाका विभिन्न एफएम रेडियोमा समेत प्रस्तोतामा रुपमा काम गरेकी थिइन् । घाइते महेश जापानमा बसोबास गर्दै आएका छन् । उनी गत महिना मात्र नेपाल फर्केर पहिल्यैदेखि प्रेम सम्बन्धमा रहेका रुपासँग बिहे गरेका थिए ।

स्याङ्जाको कालिगण्डकी गाउँपालिका–४, बिर्घामा रहेको माइतीमा बिहेको दुलान फर्काएर मालिका गाउँपालिका–१, नेटा गुल्मीमा रहेको घर फर्कने क्रममा स्याङ्जाको मालुङ्गा नजिकै उनीहरू चढेको लु३७प ३०९० नम्बरको स्कुटरलाई र विपरीत दिशाबाट आएको लु१च ७२५६ नम्बरको जिपले ठक्कर दिएको थियो ।

घाइते थापाको उपचारको क्रममा पाल्पामा रहेको लुम्बिनी मेडिकल कलेज प्रभासमा ज्यान गएको जिल्ला प्रहरी कार्यालय पाल्पाले जनाएको छ ।

घाइते थापाका श्रीमान् महेशको लुम्बिनी मेडिकल कलेज प्रभासमै उपचार भइरहेको छ । उनको अवस्थासमेत गम्भीर रहेको अस्पतालले जनाएको छ । उनीहरूको ११ दिनअघि मात्रै मागी बिहे भएको थियो ।

मगर विद्यार्थी संघ पाल्पाकी पूर्वअध्यक्षसमेत रहेकी मृतक थापाको शवलाई जिल्ला अस्पताल पाल्पामा पोस्टमार्टमपछि आफन्तलाई बुझाउने तयारी भइरहेको प्रहरीले जनाएको छ ।